宁德市图书馆

亲像噩梦醒过来，一身苦切啥人知？
  不是结婚日子坏，稳是命中早安排。
  死爸死母心头酸，死翁死某割心肠，
  君汝乜会做你返，害阮日暗苦勿光。
  天光日暗受拖磨,害阮一身勿快活，
  千般万项无依倚，亲像死鼠据猫拖。
  死人耳腔无听见，做你阴间领库钱，
  和尚功德做圆滇，互悦目屎流几瞑。
  一日无翁如三冬，阮身艰苦无采工，
  掀起蚊帐不愿放，两个枕头剩一人。
  翻坐床中目眶红，伸手去摸摸无翁，
  心中想着茹葱葱，歹命查某守空房。
  想起这命甲即坏，肠肚恰惨刀在削，
  千声叫君君勿应，万声嚎君君勿来。
  感谢婶姆会做人，疼我仔儿照起工，
  死人将阮母子放，细仔何时才成人。
  单身看仔想爸母，抬头无见我丈夫，
  一家团圆穷赢有，无翁查某逐项输。
  天光哭到半瞑后，年头苦你到年兜，
  君你有情魂着到，眠梦着来阮心头。

①翁：指丈夫。