宁德市图书馆

男：松柏锯断头齐齐，割芼娘仔头插花，
  恁厝家伙是无侪，寒天割芼无穿鞋。
  女：松柏锯断头向天，郎君目睭③生坦欹④，
  阮是骨力割芼草，喝是阮厝无银钱。
  男：阮厝家产项项有，钱银至少二三橱，
  一心想卜起大厝，杉木已买几百株。
  女：割芼郎君爱风骚，家中无钱讲佚佗，
  是你生嘴恰能讲，看汝穿衣无钱哥。
  男：郎君呣敢讲佚佗，无钱呣敢起下落⑤，
  等待下落若起好，才请娘子来佚佗。
  女：看你郎君能讲空，敢说汝厝有钱人，
  番薯尽掘一酒瓮，米粟尽割一火瓮。
  男：阮厝真是有钱人，吃用和人不相同，
  米粟收成几谷桶，再吃三年也呣空。
  女：郎君讲话免相欺，汝厝有无阮全知，
  灶顶一支坏煎匙，厝内一领破棕衣。
  男：灶顶一盒番仔火⑥，厝内一支水烟吹，
  会得娘子阮厝坐，请你蚵干秫米糜①。
  女：我看郎君无啥货，火棍讲成水烟吹，
  若去郎对汝厝坐，呣嗵到晚等无糜。
  男：蚵干秫米是粗货，山珍海味规大炊②，
  惊你娘子呣来坐，免惊阮厝无槛糜。
  女：看哥厝内半项无，无米佫饲③“阔嘴婆”，
  三顿量米无米管，番薯糙米吃甲无。
  男：阮厝被单桌框做，眠床橱桌金水画，
  面油香粉买真侪，帐前葱葱绣红花。
  女：郎君大空呣免讲，被单已盖三代人，
  好是祖公留一项，若无瞑时着盖粽。
  男：阮厝吃饭用牙箸，终年呣免吃番薯，
  赤肉还嫌涩锯锯④，专配蚵干和鱿鱼。
  女：听说你厝竹子箬，终年无米咬番薯，
  赤肉无齿不敢煮，着等海干捉鱿鱼。
  男：阮厝煮饭用煤火，卜炖猪肉大铜锅，
  饮茶是着有茶配，水衫一日换几回。
  女：阮是念歌念佚佗，呣是有意卜设哥，
  劝哥穑头着照做，有闲阮厝来佚佗。
  男：文明娘子来报路，问娘汝厝的路途，
  不知娘厝啥住所，未曾走过卡生疏。
  女：十荚香蕉九荚翘，阮厝内田顶岭寮，
  真名实姓共哥说，小女叫做蓝阿娇。
  男：前岭过了后岭埔，无灯无火暗暗摸，
  三块大厝摆一所，互①哥找无卜如何。
  女：前岭过了后岭埔，哥汝卜来呣免摸，
  阮厝就在头一所，哥汝有心勿糊涂。

①芼：野菜。 ②讲空：讲大话。 ③目睭：眼睛。 ④坦欹：斜眼。 ⑤下落：二进房屋的前面一排。 ⑥番仔火：火柴，民间俗称“洋火”。 ①糜：粥。 ②规大炊：一大蒸笼。 ③佫饲：饲养。 ④涩锯锯：难入口。 ①互：给。