宁德市图书馆

春乃立了树叶青，一心做田路边行，
  一人做到两人事，手中做事望娘行。
  春乃立了树叶开，一心做田路边来，
  一人做到两人事，手中做事望娘来。
  做田郎子是清闲，擎把锄头案上天，
  日中弄娘做工事，暗来回转没睇见。
  做田郎子是巧贤，擎把锄头转连连，
  日中弄娘做工事，暗来回转没见面。
  田中做事莫恋郎，恋郎田肚做唔上，
  乃想田边做饭吃，莫在路边打流郎。
  田中做事莫恋妻，恋郎田肚做唔是，
  乃想田边做饭吃，莫在路边打漂流。
  田中做事没火堆，唱条歌子改心开，
  人人讲我快乐子，日头成工①晒过来。
  田中做事没火欢，唱条歌子改心肝，
  人人讲我快乐子，日头成工晒透暗。
  娘子做田没紧要，锄头擎到满路漂，
  一年未做四季事，油草更大茅蔸寮②。
  娘子做田没紧工，锄头擎到满路中，
  一年未做四季事，油草更大茅蔸蓬。
  田内禾黄唔想收，乃想白花③满山游，
  寮内家堂唔想管，乃想路边打漂流。
  田内禾黄唔想做，乃想白花满山何，
  寮内家堂唔想管，乃想路边打流郎。
  贤嫂做田没紧工，锄头擎到满山东，
  锄头擎到懒做事，没缘做事心头痛。
  贤嫂做田没紧工，锄头擎到满山漂，
  锄头擎到懒做事，没缘做事心焦焦。
  铁打锄头响吟啷，唔怕田头草生长，
  唔怕田头草生大，锄头挖去起何光。
  铁打锄头响铃铃，唔怕田头草生深，
  唔怕田头草生大，锄头挖去起何金。
  做田莫做冷水杭，子细莫讨大阜娘④，
  门前栽棵柑橘树，主家未吃客家尝。
  做田莫做冷水丘，子细莫讨大媳妇，
  门前栽棵柑橘树，主家未吃客家游。
  门头大坋细细杭，细细牛子背千两，
  犁头犁去三寸地，细细秤砣压千两。
  门头大坋细细丘，细细牛子背千斤，
  犁头犁去三寸地，细细秤砣压千斤。
  干田没水是难耕，几多河水落深坑，
  几多贤娘生相好，生得相好多人仰①,
  干田没水是难锄，几多河水落深河，
  几多贤娘生相好，生得相好多人看。
  弄娘做田上下杭②，眼看贤嫂生清相，
  保护天上落大水，洗掉娘田作一杭。
  弄娘做田上下丘，眼看贤嫂生清秀，
  保护天上落大水，洗掉娘田作一丘。
  弄娘做田上下杭，看见贤嫂生何相，
  你娘命好做何吃，我郎穷鬼欠人账。
  弄娘做田双挂界，看见贤嫂生的精，
  你娘命好做何吃，我郎穷鬼欠人债。
  弄娘做田双挂界，眼看娘手转得快，
  一人做到两人事，暗来大片做过界。
  弄娘做田双对门，眼看娘手转纷纷，
  一人做到两人事，暗来大片做过东。
  弄娘做田双挂界，你的禾好我禾细，
  两人八字拿来睇，你娘命好我命呆。
  弄娘做田双界杭，你的禾好我禾黄，
  两人八字拿来睇，你娘命好上京堂。
  田头莫分草生长，一年耕到两年粮，
  寮内老谷未吃了，田内新谷又进仓。
  田头莫分草生青，一年耕到两年田，
  寮内老谷未吃了，田内新谷又进坪。
  田禾乃爱水来浸，度①娘乃爱度好心
  度娘乃爱娘心好，娘今心好值千金。
  田禾乃爱水来养，度娘乃爱好心肠，
  度娘乃爱娘心好，娘今心好值千两。
  新做田头一杭杭，春来放水浸禾秧，
  忙的贤嫂做何吃，懒的人子打流郎。
  新做田头一丘丘，春来放水浸禾丘，
  忙的贤嫂做何吃，懒的人子打漂流。
  落透田边紧紧做，公婆和顺笑呵呵，
  先前怨语莫去讲，使心做了寮内何。
  做田做透五里背，五里界头没水来，
  放落心肠去睇水，锄头未放水先来。
  做田做透五里岭，五里界头没水响，
  放落心肠去睇水，锄头未放水先行。
  做片田子在路背，等郎来睇野了野，
  三年闰月睇回水，十声应郎没工来。
  做片田子在路贝，等郎来睇野成山，
  三年闰月睇回水，十声应郎没工行。
  做片田子在半洋，你娘犁田来叫郎，
  田肚乃何绊心石，稍稍拗掉郎犁王。
  做片田子在半腰，你娘犁田来叫透，
  田肚乃何绊心石，稍稍拗掉郎犁头。
  做田做透大路边，一头做事一头仰，
  一头做事一头睇，唔知贤嫂几时行。
  做片田子路远遥，过条坑子过条桥，
  日头平界就爱转，安步唔转转唔透。
  案头吃了望吃周①，锄头擎到满路游，
  爷娘讲我懒做事，田中做事唔知周。
  案头吃了望吃周，锄头擎到满路游，
  落在田中懒做事，没心做事想转周。
  周乃吃了望天暗，锄头擎到满路览，
  爷娘讲我懒做事，田中做事想转暗。
  周乃吃了望吃暗，锄头擎到满路览，
  落在田中懒做事，没心做事想转暗。
  米株作子溜溜乌，你娘嫌我做田粗，
  你娘嫌我做没事，铁打锄头都使枯。
  米株作子溜溜黄，你娘嫌我做田郎，
  你娘嫌我做没事，铁打锄头都使光。
  贤嫂做田未做山，一年四季讲没闲，
  一年做到四季事，难得弄娘来相见。
  贤嫂做田未做山，一年四季讲没空，
  一年做到四季事，难得弄娘来相问。
  做田莫做冷水丘，莫做大寮②人媳妇，
  大寮人饭是难煮，碗筷叠叠是难收。
  做田莫做冷水窠，莫做大寮人公婆，
  大寮人饭是难煮，碗筷叠叠是难做。
  牛押弯弯柴来做，两头凿窟牛来拖，
  一工犁到几斗种，等娘担秧来栽禾。
  牛押弯弯柴做成，两头凿窟牛来耕，
  一工①犁到几斗种，等娘担秧来栽成。
  娘乃拔秧郎栽禾，栽分大路等人赏，
  栽分大路等人睇，唔会太密唔会疏。
  禾子直直是郎栽，栽在田边发起来，
  禾乃转青爱蓐草，草乃蓐了水放来。
  禾子甲秋姐妹杭，草乃蓐了分开上，
  禾子发来做饭吃，批子拿去温泥浆。
  禾子甲枇两姐妹，草乃蓐了分开来，
  禾子发来做饭吃，秕子拿去温泥霉。
  门头大坋是娘耕，细细牛子赶去耕，
  犁头犁去三尺地，禾子栽落就转青。
  门头大坋是娘的，细细牛子赶去背，
  犁头犁去三尺地，禾子栽落就转变。
  禾子栽落就转青，四角四斗栽得正，
  树开东干麻做袋，大富贤嫂仰郎轻。

①成工：整天。 ②茅苑寮：茅草房。 ③白花：男人。 ④大阜娘：大龄老婆。 ①仰：看。 ②杭：丘。 ①度：帮助。 ①周：中饭。 ②大寮：大户人家。 ①一工：一天。