宁德市图书馆

送娘转，泪成行，眼泪全把跌衫上，
  父母问郎因何事？心头想察生好娘。
  娘不短，又不长，仰娘美貌真有相，
  面子红红鸭蛋样，又不瘦来又卖壮。
  又不瘦，又不壮，裙衫合身似金妆，
  来透郎寮坐一下，洗白泥碗冲沙糖。
  白泥碗，冲沙糖，一碗清茶分娘尝，
  双手掏茶分娘食，茶气浓来喷喷香。
  茶食了，碗还郎，叫娘安心坐前廊，
  郎寮过有红老酒，银瓶装酒排桌上。
  酒热了，又开仓，豆子来炒酥又香，
  山头地界无乇买，炒豆送酒是家常。
  酒倾起，桌上来，劝娘淡酒食一杯，
  你娘又讲酒量浅，人情三杯酒莫退。
  倾一盏，退一杯，郎今不倾饭装来，
  酒醉卖食几多饭，桌上浅薄无好菜。
  郎去舀，饭掏来，装饭白碗高山台，
  双手搭来面前食，上又朝眼下顶嘴。
  饭食了，感谢郎，难得贤郎招待娘，
  一双鞋子谢你礼，郎着卖短又卖长。
  娘讲转，慌茫茫，细声言语来留娘，
  今晡奴娘嬲一夜，明日送娘转回乡，
  娘讲转，紧迢迢，细声言语又来留，
  新做见衫领未绣，新做衣裙花未修。
  娘讲转，紧当当，十成要转我不拦，
  留蜂上桶不做蜜，担水荫田总是旱。
  嬲一夜，天透光，我郎手信拿分娘，
  千句言语一句讲，几多言语讲未光。
  送娘转，慢慢行，手信收入藏身边，
  郎回三步车转太，娘行十步九个仰。