宁德市图书馆

笔头落纸字才才，爱唱钟令大帕岁，
  掌在西岐少数在，一个爱人给人带。
  从头唱出给人听，光绪管下二十年，
  就是本年过七月，半乃过了三十三。
  七月覅短又覅长，二人落海去思良，
  阿凤又奴阿妹讲，明日带你过别乡。
  阿凤就讲阿妹听，钟令寮里也平正，
  翁者做人又厉害，做乇落佢手下柄。
  阿妹见讲是也是，忖起翁者真逗气，
  我今从久是有靠，明日就好跟你去。
  二人双双来思良，奴娘双喔转回乡，
  千句言语奴娘讲，明日逃走过别乡。
  怪生阿凤有良心，七月二三带起身，
  带走有寮有定落，掌落后门大树林。
  住了一夜起身行，一直去到保苋岩，
  保苋岩头落尽难，难那过了起身行。
  二人逃走笑咽咽，一直去到二贝亭，
  更亭古庙过来了，一直去到是仙宫。
  仙宫过了起身行，一直去到是孔坪，
  怕了家里人寻着，二人逃走太姥山。
  二人逃走太姥山，太姥山上讲娘听，
  又奴和尚讨饭食，又给四都人睇见。
  和尚听讲办答咀，问佢二人念里来，
  阿凤开口奴佢讲，怪个是我喔阿妹。
  和尚听讲是也是，姐妹双喔抽签诗，
  和尚又讲签诗好，明日逃走别村去。
  一直去到是龙亭，龙亭街路冷清清，
  阿凤又讲好食酒，阿妹又讲煮点心。
  龙亭过来李溪岩，一直去到七溪坪，
  彩成寮里去歇夜，又交阿妹住怪前。
  彩成寮里去安身，阿凤回转去探信，
  听知寮边人讲话，苎骨点灯好怕人。
  钟令寮里闹嘈嘈，走去湖头问亲家，
  亲家又讲有怪事，前日暗晡有双骂。
  亲家听讲气麻麻，开口就骂亲家婆，
  你做老者多厉害，你今紧紧就去罗。
  转来寮里好怨深，奴仔思良下小心，
  又去桥下下大愿，又下银仔对大金。
  下了大金二三千，走去城隍下个添，
  先生又讲念样下，又下猪头连三牲。
  小心下了心未番，又交阿满喔先生，
  又去东坑喔梅此，又交梅此喔战天。
  先生讲话笑炎炎，一直去到你厅前，
  又交主人去拁桌，做起文书奏上天。
  先生门书实是灵，做起文书奏天庭，
  地头公主来双赠，拐子二人头怕眩。
  小心下多走劢去，又走湖头歇三晡，
  又走湖头歇三夜，明日逃走月山去。
  主人想起好怨深，又带二人来去寻，
  二人又讲有饭钱，二人拁去一个银。
  拁了饭钱起身行，一直去到赤溪坪，
  赤溪人仔有睇着，又讲前日去月山。
  二人回转到龙亭，有经睇见笑音音，
  你会两人做怪事，害佢寮里对我寻。
  四人义合冇陈排，二人又带蒋阳街，
  又被霞浦人冲着，阿凤跪佢二三拜。
  林昇睇见气沉沉，骂你阿凤覅是人，
  林昇睇见就喊打，阿凤出佢八元银。
  阿凤有银覅放佢，又讲寮里有头猪，
  猪那卖掉那有够，家俬变当也给你。
  二人寻着转回信，转来寮里讲分明，
  又讲番钱拾头对，爱你银钱去揪人。
  佢母听讲开口问，问佢二人掌念村，
  问佢念村你寻着，谁人开口要我银。
  阿凑有经讲分明，爱母银钱去揪人，
  开口拾对共八对，再有也要一半银。
  佢母开口问有经，念做要钱去揪人，
  寮里银钱都对了，家内也有半对银。
  佢母听讲乃是骂，二人议论就落家，
  起头又讲拾把对，屎头又讲一半价。
  别人听讲是覅信，莫知二人会吃银，
  人那寻着就带转，念做要银去揪人。
  居母忖起好怨深，又去别村去借银，
  又借银钱三四元，拁给二人就起身。
  叔伯又讲做陈去，二人又讲覅使去，
  给我二人走去喔，人乃喔转交待你。
  二人收拾办起身，叔伯二人屎头跟，
  睇你二人去念路，念里地方去寻人。
  二人逃走去别乡，二人坐在六都洋，
  又给贱哥睇见着，骂你泼贱野花娘。
  佢哥睇见就骂妹，骂你花娘覅是坯，
  花娘你会跟人走，有敢跟人满山来。
  阿妹听讲就答咀，寮里双骂走出来，
  我今逗气跟人走，又是阿凤带我来。
  阿哥听讲气茫茫，三人又喔转回乡，
  三人双喔回家转，阿风逃走过别方。
  二人寻着转回家，翁者睇见乃是骂，
  花娘你会跟人走，害我银钱用几多。
  村里叔伯人都到，阿妹一时捉来招，
  缚起竹枝就喊打，一下打落大声嘺。
  阿哥做人实是歹，走去灶头拁刀拜，
  刀拜拁来就喊斩，阿妹一下讲出来。
  阿妹一下讲分明，阿凤带我实是真，
  真真是佢带我走，冇敢虚言来骗人。
  叔伯听讲气沉沉，就讨阿凤捉来真，
  钟令本是冇用仔，打佢三拳手错筋。
  打佢三拳好懒我，交人去喔保长来，
  报个保长来讲话，寮里家俬尽搬来。
  阿妹忖起有主意，怪事是我来害你，
  千害万害被我害，家俬搬走就抓猪。
  保长做事实是歹，走去后门就捉鸡，
  鸡乃冇捉冇工钱，交佢番茹估给我。
  番茹估给保长公，阿凤佢母心肝痛，
  我今养个败家子，寮里家事搬尽空。
  覅唱家才搬走去，再唱钟令寮里去，
  奴仔思良来还愿，愿乃还了就在佢。
  先生请来做文书，又奴神明去通知，
  明日许告你良愿，今日舍愿来还你。
  古人造歌是翰林，唱给人听人人信，
  劝你大细着讲理，冇道有理莫害人。
  歌言四句唱来对，造出歌言教大细，
  书名喔做逃婚记，歌名喔做拐子带。
  六十条歌造来教，人人传唱莫丢掉，
  讲来又是有大事，正是离世被人笑。
  歌言四句造来对，造歌也要好肚才，
  歌言四句二八字，句句都是劝人乖。