慈溪市图书馆

孙如游（？一1624）明浙江余姚人，字景文。万历进士，累官礼部右侍郎。泰昌时进礼部尚书。光宗死，以东阁大学士入内阁，言者交章论列。天启元年（1621），加太子太保，文渊阁大学士，旋致仕。
  ——《中国人名大词典·历史人物卷》第196页
  孙如游（1539—1624），今慈溪市横河镇人。
  孙阁老巧治道台
  一年春天，孙阁老孙如游乘船到外头去游嬉。船老大晓得孙阁老的时辰八字和自己一样，伊当阁老，我当老大，心里想勿通，就把自家时辰八字挂在船头。孙阁老看见就问：“这是啥东西？”老大讲：“是我的时辰八字。余姚横河孙家境有个孙阁老，和我同年同月同日同时辰，我做老大日脚难过，伊做官享福，勿晓得啥缘故？”孙阁老看看老大倒也可怜相。
  船一撑撑到黄河地界，黄河有个黄河塘，老话讲，黄河通天，水是天上来的。皇上派了十万人力，在这里修塘筑坝，拨出一斗黄金打铜头铁脚桩，筑黄河派用场。而道台老爷瞒过皇上，在黄河塘打的是树头桩，黄金统统藏进腰包里。孙阁老晓得其中底细，就问老大：“侬要发财■？”老大说：“啥人勿想发财？”孙阁老讲：“要发财就听我话，侬去劈黄河塘里的树桩头来烧饭。”老大心想，劈树桩头要犯法杀头，连忙话：“勿敢勿敢。”孙阁老讲：“侬尽管去劈，出事体有我来郎，想发财就大胆去劈。”
  老大被孙阁老一话两话，心动哉，拿起钩刀，到黄河塘噼噼啪啪就劈。一劈两劈，守黄河塘的兵看见哉，一把拖牢，将老大五花大绑推去见道台老爷。老大慌哉，连忙喊救命。孙阁老眼睛眨眨叫伊甭慌，我后头会来。老大被推到道台衙门，小兵告诉老爷，这个老大劈塘里的树桩头，阿拉亲眼看见，亲手抲牢，刀也缴来，桩也摆着。道台老爷一听有介事体，光火哉，案桌一拍，开口就骂：“大胆刁民，侬晓勿晓得皇法？塘桩劈掉，塘塌落来要出人命哉，先给我打五十大板。”“啪啪啪”二三十记打落。
  这时，孙阁老赶到。道台老爷认得孙阁老，连忙问：“孙大人到来何事？”孙阁老讲：“侬为啥打一个老头？”道台老爷回答：“我奉圣旨筑黄河塘，每隔一丈打一个桩，伊劈之当柴烧，这里还有介多一堆柴爿摆着，理该问罪。”孙阁老说：“伊用啥家伙劈的？”道台讲：“就是这把钩刀。”孙阁老说：“介倒奇煞哉！我记得皇上叫侬打的铜头铁脚桩，钩刀咋会劈得进？真是乱讲三千。”孙阁老一句闲话讲落，道台老爷心里虚哉，恐怕事体穿绷，连忙就说：“孙大人，小的知罪，小的知罪。”孙阁老先勿睬伊，动手把老大身上的绳子解掉。
  老大才晓得这个客人就是孙阁老，胆气也大哉，就讲：“我路也走勿来哉，下趟船也撑勿动哉，以后日脚叫我咋过过？”孙阁老对道台老爷说：“侬身为道台，贪赃枉法，这个老大介大年纪，今朝打得介样子，侬快送他一百两银子医伤。”道台求之不得，连忙叫人捧出一百两银子给老大，于是案子了结，老大再也勿撑船哉。